如果各位想找一隻狗,外表比較特別,看似惡惡地,守門口嚇得吓人,但其實係綿羊扮老虎,以下我有好介紹.隻狗狗係以下兩位嘅愛情結晶品之一.

佢係狗房的一個謎,因為以佢超級可愛及嗲屎人嘅性格,好唔明點解到而家仲未被人領養囉.佢喺狗房長大,細個果時已經毛茸茸好得意,性格幾為食,乜都食一餐,見到任何食物,即刻雙眼發光,最高紀錄係喺你離開視線範圍幾分鐘內偷吃晒一盤雞柳.佢亦稱得上是狗房最懶的狗狗,若無所事事, 無嘢好食,可以全日抱頭大睡,外面發生嘅任何事都完全影響唔到佢嘅睡意,但佢又會喺你唔為意嘅時候偷嘢食偷嘢玩,被你發覺仲會即刻瞓低扮死,或者扮無事行開,但隻眼又睄住你,好搞笑.而家天氣寒冷,佢又可以做狗肉攬枕,抱住佢好溫暖,無呃你,因為我試過.講咗咁耐,喺時候比大家睇吓佢嘅嘜頭.

一條盤龍蟮

練緊功,請勿打擾!

我就係傳聞中嘅超級無敵可愛Bart, 又名Bart Bart豬 (啲無聊人類叫嘅),

行年歲多,尚未娶妻,唔知你哋有無好介紹呢!

我一啲都唔為食,亦唔爛瞓,只係好衣食,明白食得是福,瞓得是祿嘅道理.

我每天都好勤力咁巡視,睇吓有無啲人類無手尾,留低啲剩餘食物,我會幫忙清理.

各位老細,唔知你哋有無興趣帶我返屋企,

我嘅要求好簡單咋,只求兩餐一宿,耐唔耐有雞肉食吓就得架.